雨季運動無場確冇癮
每逢雨季來臨,都係一衆波友惡夢的開始,皆因本澳衆多自由波地都無遮無擋,落雨天基本等於唔使打波。好似近日咁嘅天氣,已經持續咗一段日子,預計到下周中才開始好轉,相信各位波友一定手痕腳痕到不行。
籃球情況可能會比足球好,因為一些籃球場設在天橋底,起碼都算有瓦遮頭,有時即使天氣不佳,仍能看到有人在場內練波,影響相對較小。但足球則不然,觀乎澳門所有自由波地,沒有一個是有遮擋的,換言之落雨天肯定無法如常踢波。雖然還有個別室內場可供使用,但天下並無免費午餐,價錢並非每人都能支付,加上落雨天室內場生意基本爆滿,可謂一場難求。
有波友就埋怨,雨季有時一落就兩個星期,由於室內場館少,想運動一下亦要被迫放棄。跑步、踢波、打籃球等運動一概要全部取消,生活頓時變得毫不精彩。希望澳門能增設多功能大型體育館,滿足一衆市民對運動的需求。亦有波友指出,希望當局能在自由波地增設遮蓋,至少在雨天時亦能如常打波,盡量減少對波友的影響。
雨季確實頭痕,下雨天本來已減低外出意欲,現在連運動亦受掣肘無法進行,被迫留在家中,短則兩三天,長則十數天,長久下去都幾苦悶。希望有關當局能想想辦法,照顧一衆因雨天而無法運動的居民。
賈大廚
留言