笑談英超教頭
長達十個月嘅英超終於“散band”,首先恭喜曼城三年抱兩又再封王,恭喜“蘇七”成為今季英超神射手。一隊波嘅成功除咗講求實力之外,領軍當然最重要,今日就同大家講主帥。
不得不講梗係曼城“阿頭”柏歷連尼,初到貴境執教英超就可以帶領球隊奪冠,呢位智利工程師果然有料到,因為教英超球會呢份工真係唔易做,更何況一入豪門深似海,奉勸“柏蛇”一句,刹那光輝唔代表永恒,希望你在曼城之路一路好走。
成功與失敗只係一線間,正如紅軍統帥羅渣士一樣,今季都算大上大落,幾乎可以為球隊首奪英超冠軍,可惜始終埋唔到尾,唔通連個天都唔鍾意“羅生”?勢估唔到會畀“謝隊”跣鑊甘,成也“謝隊”,敗也“謝隊”,紅軍唯有認命。
其實最叻都係“老摩”,由皇馬重返車仔前已事先張揚事件,要將車仔年輕化,放眼於未來兩三個球季,今季戰績並非有太大要求。小弟又即管放長雙眼,睇吓我偶像“老摩”係未真係咁牙擦。
今季英超最死得轟烈教頭非莫耶斯莫屬,唔需要講太多,總之被全世界“魔粉”鬧爆,所以話“冇咁大個頭,唔好戴咁大頂帽。”
足球評述員 Ben
留言