好波連場感悟人心
好波連場,徹夜精彩!踏入季尾,歐戰多個賽場陸續收咧,最後一輪聯賽、盃賽決賽陸續上演,球迷們大嘆好波冇幾場再睇之餘,亦期盼各項錦標最終花落自己所捧的隊伍身上。昨踏入凌晨零時起,英格蘭足總盃、西甲聯賽王者一戰、德國盃決賽先後上演,好波接住播,球迷大飽眼福,大呼過癮!
全球最受歡迎的英、西好波撞晒期,足總盃阿記對侯城與西甲巴塞對馬體冠軍爭奪戰同時開賽,除非家中電視有畫中畫或兩部電視並排放,否則要兩擇其一收看。或如賈某般手機、電視兩邊播,眼球左睇右看。好在賽事分分鐘精彩無悶場,辛苦一點亦值回票價。言歸正傳,三場波鬥得難分難解,阿記要藉足總盃一破九年冠軍荒,但腳未站穩已連丢兩球,幸槍手鬥心不滅,連追三球後上奪標。
西甲王者爭冠同樣精彩萬分,新科西甲王者馬體會頂着開賽早早損兵折將、半場落後的劣勢,半場過後大打士氣波扳平,再嚴防死守保和局成功登頂。德國盃一役,拜仁與對手攻足百二分鐘,終加時最後階段連入兩球如願捧盃。
三場賽事過程不盡相同,對攻、攻防戰皆有,但當中不失相同之處,就是球隊在落後、劣勢下未見氣餒,依然憑無比戰意,堅持到底,最終得償勝果。所以話,世上無難事,只怕有心人,只要有準備、肯堅持、盡全力,總有收成正果之時。即使失敗了,堅持過、努力過,也為人生上了寶貴一課。
賈大廚
留言