業餘教練更要充實提高
近日世界足壇焦點均落在一人身上,就是將於世界盃後入“魔”做曼聯領隊的雲戈爾。曼聯今季戰績屢創新低,一衆“魔”迷等新教頭等到頸都長,究竟教練對一隊波有幾重要?賈某就同大家討論一下。
有網民在網上諷刺前曼聯領隊莫耶斯:“一個強勁嘅領隊可以令一隊波變強,一個‘世界級’嘅領隊就可以令十幾隊波同時變強。”暗諷在莫耶斯領軍下,英超其餘球隊今季成績都突飛猛進,就連榜尾的幾隊球隊都成功在衛冕的曼聯身上搶分。同樣的班底,一年前拋離次席九分奪標,今年卻落後榜首廿二分,相信教練對球隊的重要性大家都不言而喻。回歸本澳,其實教練一啲都唔易做,除昨日提到的發展隊外,部分球隊亦同樣面對後備球員懶散的情況,不過由於有外援機制,加上外援球員為博表現都出心出力,情況未至於如同全“土炮”的發展隊一樣。
除足球外,本地衆多教練皆以業餘性質居多,多數憑熱誠堅持下去。不過賈某希望教練在培訓年輕球員時,亦不忘裝備自己,多修讀教練進修課程,趕上世界的步伐,共同搞好本澳體壇。講開又講,體發局聯同北京體育大學合作開設的“教練員培訓系列課程”之單元四課程(訓練監控新知)將於下月廿六至廿九日舉行,歡迎各體育總會推薦合適教練員報名參加,共同提升本地教練質素,惠及本澳體壇。
賈大廚
留言