世界盃形勢分析(二)
繼續講世界盃分組賽出線形勢,C組爭持應該比較激烈,但四隊當中,個人絕對睇好哥倫比亞,甚至認為係奪標黑馬。因為今屆人腳實在強到不得了,雖然有超級神鋒花高加西亞因傷缺席,但依然人強馬壯,有剛為西維爾勇奪歐霸盃嘅巴卡,波爾圖前鋒馬天尼斯,洛迪古斯、古亞連、阿古爾拿、古亞達度及沙柏達等都係實而不華球員,前中後三線比同組三隊較為平均。加上有半個地頭之利,哥倫比亞係C組出線首選。
今屆五支非洲球隊中,科特迪瓦應該最具實力。在曼城打晒嘅Y杜尼狀態“弗”到爆,仲有好兄弟K杜尼、卡羅奧、謝雲奴及邦尼等在歐洲五大聯賽搵食球星,當然唔少得老將杜奧巴,有足夠能力殺入十六強。
希臘與日本雖然仍有一定威脅力,可惜短期內踢三場大戰,體能素質方面肯定比哥倫比亞與科特迪瓦輸蝕,出線機會較微。
最值得留意嘅係死亡D組,除哥斯達黎加外,英格蘭、意大利及烏拉圭將會爭餐死,最激就係英意先打頭陣,邊隊輸波隨時係咁先。意大利勝在大戰經驗十足,烏拉圭也佔地利優勢,兩隊可以稍為睇高些少。
足球評述員 Ben
留言