結局太天真
《女人俱樂部》大結局一氣呵成,能否衝破三十點收視?很快便可揭盅。播了三十集,雖則收視一直未見有大突破,但明顯該劇集口碑愈來愈好,而且都比較正面,足證台前幕後一番努力並沒有白費,有麝自然香。
結局是大團圓,個個都有好收場,江欣燕末期癌症可以忽然醫好、葉蘊儀冇咗猥瑣老公卻可搵到個老外名醫、張慧儀搵到個八○後又可做媽咪、李麗珍話咁易贏得老公與女兒原諒、連吳啟華與陳慧珊呢對怨偶都忽地重新愛過……嘩,簡直是所有中女的美夢,不過就好似都市童話、海市蜃樓。
這個戲整體完整,就是結局來得太天真太傻,只為製造完美效果,卻不管合理與否。但全劇故事不落俗套,對白寫得精警、八○年代金曲貫串其中,既滿足觀眾懷舊心態又悅耳動聽。將兩個年代女性的友情、愛情、親情交叉進行,穿越時空的處理並不容易,卻能帶出時代氣息,多少能勾起觀眾對那個美好年代的絲絲回憶。只是現實生活中,有幾多人可以擁有自己的M Club?
韋 楓
留言