阿根廷十月訪港
廣東人有句説話,“你睇我好,我睇你好。”香港波友經常都話澳門球迷真幸福,無論世界盃、歐洲國家盃、歐洲最頂級聯賽,甚至洲際盃等各大型國際賽事,都有免費直播睇,恨到班波友流晒口水。
其實咁又點吖!正所謂聞名不如見面。我哋睇到咁多世界級球星都只係喺“公仔箱”,佢哋就多次可以親身欣賞到唔少超級球星風采,比澳門球迷更加幸福十倍。
正如十月十四日,阿根廷國家隊將會到香港與港聯踢友誼賽,合約仲講到明,球王美斯、阿古路及迪馬利亞等會隨隊,至少要有十五名出席今屆世盃決賽周的球員。身為阿根廷兼美斯嘅超級粉絲的我,又點會唔羡慕又妒忌。
“港粉”唔單只可以睇到阿根廷,香港波總仲傾緊九月邀請決賽周另一支南美勁旅烏拉圭。如果成事的話,香港今次真係“一波未平一波又起”,烏拉圭三大攻擊手——蘇亞雷斯、科蘭及卡雲尼已夠晒睇頭,雖然“哨牙蘇”與卡雲尼目前有傷在身,但仲有兩個多月,到時冇病冇痛都會隨隊出戰。
今次輪到我哋班澳門迷恨到發燒,唯有撲飛過江睇。各位“陀地”波迷到時撲飛即管出聲,記得預埋我。
足球評述員 Ben
留言