森巴軍又將有苦戰
南美球隊對決,好睇過戲!世界盃踏入十六強,首戰巴西鬥智利已鬥得精彩、火花四濺。巴智一役雖然入球唔多,只有兩粒,但兩軍鬥快、鬥攻、鬥逼搶,踢到飛沙劈石,攻足一百二十分鐘,最後用殘忍又刺激的十二碼方式定生死。即使隔住個電視屏幕,相信一衆巴迷亦緊張到震。
十六強無弱兵,真係唔係吹水,第一場已咁激,球迷肯定大飽眼福。講返十六強首戰,咪睇智利在分組賽被荷蘭○比二殺敗,今仗對手又是己方往績輸九條街、輸多贏少的巴西隊,仍能在先失一球下傾力反撲,憑小組滲入、快速逼搶,成功半場前追成平手。智利兵得勢又得分,下半場愈踢愈順,與森巴兵勢均力敵,唔知還以為在智利主場比賽。鬥到加時,兩隊繼續互有攻守,智利完場前一分鐘,山齊士妙傳賓利拿的射門若非中楣彈出,森巴兵有冇機會踢十二碼真是一大疑問。
十二碼大戰,刺激程度一樣叫球迷大按平安鐘,皆因兩隊射唔入的球員梅花間竹出現,先是智利頭兩輪射門被巴西門將施薩擋出,後是巴西又有韋利安及侯克做敗家仔。但幸運之神最終還是眷顧主辦國巴西,智利最後一射又與門柱做朋友中柱不入,注定十六強止步。巴西晉級可說大話夾好彩,全無霸氣可言,八強對住有新“金毛獅王”在陣、踢法更有森巴味的哥倫比亞,如果唔提升狀態,睇怕又係苦戰一場。
賈大廚
留言