捱夜睇波量力而為
賈某最近發現早上的熱門跑步時段少咗跑友,難道因為世界盃緣故?有跑友反映:“水塘平時深夜十一、二點有勁多人散步、跑步。但在德國對葡萄牙當晚突然冇乜人,可能返晒屋企睇波。”如此亦難怪,世界盃吸引力非凡,男女老幼都啱睇。
南美的巴西與澳門存在時差,賽事在本地時間午夜至清晨上演,對打工仔而言實在是折磨,想睇比賽唯有犧牲睡眠時間,捱夜又驚影響翌日工作。相對而言,學生幸福得多,皆因暑假已經開始,很多人早就將生理時鐘自然調至美洲時區。
缺乏睡眠影響的不祇是精神,同時減低部分人的運動意慾,睇完場波快將日出,還要早上起身跑步、鍛煉身體,未必人人都能夠堅持,即使捱得住亦未必好。鄰埠有精神專科醫生最近發表世界盃期間的睡眠急救方法,球迷可以參詳吓。該醫生建議放工放學後可先回家休息,球賽開始時再起床;太早無法入睡可將燈光調暗,或戴上太陽眼鏡皆有幫助。同時提醒切勿依靠安眠藥,以免上癮。另外可趁假日償還睡眠債。
其實,整個決賽周長達一個月,球迷又豈能六十四場賽睇足?選擇性觀看才是最佳方法。偶爾捱夜睇波或影響不大,若然日日如是,身體恐怕頂唔住,況且又非職業球迷,睇波祇是消閒,大家要注意休息。
賈大廚
留言