阿根廷受考驗
今日首先講下頭幾場十六強的比賽,每一隊出線的球隊都係贏得好險,打完的四場中已有兩場要去到互射十二碼分勝負,荷蘭要用到九十四分鐘才能絕殺墨西哥。所以話“淘汰賽並無絕對的勝利”,比賽考驗球員之餘,更加考教練的功力。
踢淘汰賽,教練除咗賽前的安排及訓練外,比賽期間換人的時機絕對不容忽視,遲遲未換人,場上球員或者表現不對辦,會影響球隊發揮;如果一早用完三個換人名額,到真係去到加時的時候,球員體力又未必應付得到。大家在睇比賽之餘,不妨睇下各隊教練換人的決定和時機,又幫唔幫到球隊呢?
講下今天的比賽,頭場就係阿根廷對瑞士,前者雖然連勝三場在分組賽以首名出線,但每場都係“僅僅熟”,且表現認真麻麻,有睇波的球迷應該心照,前線的配合少之又少,只靠美斯單打獨鬥,其他前鋒又唔多爭氣,今仗更有阿古路受傷未必出到場,對於肯定踢守勢波的瑞士隨時老鼠拉龜。瑞士近六場都未贏過阿根廷,但憑住“防反”,今場對陣未必完全佔下風,特別係踢淘汰賽,部署同分組賽亦會有唔同,留意下美斯今次又如何拆解。
守門員 廖健早
留言