荷蘭贏教練贏插水
世界盃十六強場場緊湊,墨西哥一比二輸咗比荷蘭,橙衣軍團完場前連入兩球,戲劇性反勝墨西哥。荷蘭三個字:贏教練,又或者另外三個字:贏插水。
本來形勢大好嘅墨西哥只差十幾分鐘就出到線,球迷同球員都好開心,更加有墨西哥球迷即場向女朋友求婚,好浪漫。不過過完飲水時間,成個形勢就唔同晒。一直都踢得好好且領先一球嘅墨西哥臨完場前被追平,補時階段球證判咗球好有爭議性嘅十二碼,射入完都完場,墨西哥冇仇報,一念天堂一念地獄。
雲帥有料曼聯有救
不過有件事令我好開心,就係曼聯準領隊雲戈爾好識利用後備力量,且換人大膽,曼聯有救啦!佢趁飲水嘅時間變陣,就立刻反敗為勝,好有料。佢嘅神級調動令我好驚喜,大膽換走無傷嘅王牌雲佩斯,而班後備兵都不負所託,有勇有謀嘅領隊,曼聯需要你!不過聽聞佢之前喺拜仁教就無話特別出色,但我今場睇就覺得佢好有料啦。
插水是技術的表現
講返球有爭議性嘅十二碼先,洛賓承認上半場曾經插水,但完場前博到嘅十二碼的確被馬基斯踢中,當然另一方覺得自己冇犯規,佢話是洛賓故意碰到佢,但球證以為佢踢洛賓。先不評論洛賓係咪真係插水,我覺得有時插水係一種技術。插水嘅行為在道德上當然唔啱,冇體育精神之餘亦都冇咗足球嘅意義,而且對球員嘅形象都唔好。不過如果插水插得唔太離譜得嚟又有技術,的確可以扭轉賽果。就好似洛賓咁好戲,不管馬基斯係咪真係踢到佢而佢順勢跌,定係洛賓故意碰到馬基斯,的確洛賓扭轉了成個賽果,話佢係英雄定狗雄,只在乎你係咪荷蘭迷。
留言