德國昨晨踢得曳
德國對阿爾及利亞的世界盃十六強賽事,最終德國贏二比一出線,八強將撼法國。德國昨晨在法定時間九十分鐘都受制對手嘅防守,開頭十五分鐘一路睇覺得好古怪,阿爾及利亞主守我明白,但唔明點解壓到咁前。
德國善於利用空間打反擊,不過二十個球員堆在前半場,根本無空間做波,仲要傳球都傳失,被阿爾及利亞踢反擊。今場德國主踢進攻足球,令後防空虛,龍門紐尼亞救完一次又一次,仲做埋後衛,阿爾及利亞利用快速反擊製造機會,門神跑出禁區化身右後衛,最終飛鏟成功解圍。踢到八十分鐘,班球員一啲都唔心急仲有笑容,都唔知好嬲定好笑。幸好加時班球員即刻上身,舒卓尼九十二分鐘門前一下後腳入波,最後奧斯爾都有入球,兩隊三十分鐘入三球。
阿國神級門將
雖然阿爾及利亞輸了,但真係踢得好好,佢哋嘅快速反撃好好睇。特別我想講下個龍門麥保希,繼墨西哥門將奧祖亞後,阿爾及利亞又出現另一個門神。阿爾及利亞同墨西哥雖然都出咗局,但佢哋嘅門神成為球迷追捧嘅新門神,佢哋平時辛辛苦苦終於有成果。
經過世界盃後,佢哋嘅神級撲救帶畀球迷好多驚喜,相信身價高咗好多,可能好快就可以在歐洲各大聯賽見到佢哋。所以話,機會是留畀有準備嘅人,佢哋平時努力準備自己,現在總算有收成。
留言