八強激鬥在所難免
世界盃話咁快已經去到八強,戲肉將會一場接一場,有南美打吡嘅巴西對哥倫比亞,歐洲兩大強國“法德大戰”,神奇黑馬哥斯達黎加挑戰“橙衫軍”荷蘭;執筆之時,未知有球王美斯坐陣嘅阿根廷有冇得留低?對手又會係比利時抑者美國呢?相信邊隊對邊隊都一樣咁激烈。
睇翻十六強戰況,發覺一場過決勝真係無高低,除哥倫比亞技術性擊倒烏拉圭外,三大捧盃熱門巴西、荷蘭及德國都係贏得一額汗。東道主巴西大難不死,真係要多謝個門框,但咁打法,對住正宗黑馬嘅哥倫比亞,“森巴兵團”隨時過到初一,過唔到十五。
“橙衫軍”絕殺反勝墨西哥,全靠“插水王”洛賓,呢球十二碼係咪插水的確見仁見智,總之荷蘭大步檻過,八強對手遇上哥斯達黎加,唔好以為“依絲執”,分分鐘要打到氣咳。
估唔到德國對阿爾及利亞會踢得咁辛苦,事實上,自從首戰大勝葡萄牙後,德軍表現的確一場差過一場,真係擔心兩日後與法國嘅一場歐洲大戰。
足球評述員 Ben
留言