難分真與假
昨晨阿根廷又要踢到加時先可以淘汰對手,真係飽食驚風散,驚險殺入八強,有咁啱得咁橋,之前兩支奪標大熱,巴西與德國在一致睇好情況下,又係驚濤駭浪過關。雖然,波係圓冇話贏硬,但發揮明顯有較大變化,支持者冇乜所謂,投資者肯定損手爛腳,所以打假之聲不絕。曾經有無數波友問小弟,到底有冇假波呢?問者天真,答者講真:“足球係人為,自己諗啦。”
話口未完,非洲雄獅喀麥隆又爆出打假波醜聞,更傳出多達有七隻害群之“獅”牽涉在內。嘩!仲話內訌,夠晒齊心就真,事發於對克羅地亞一戰,據聞紅牌及波膽都係事有蹺蹊,如果屬實,文迪蘇傑硬食一挣就認真無辜,唔通體育精神真係冇“睇錢”咁精神?
一場足球比賽,投注花款實在太多,上下盤、大細、單雙、波膽、角球、界外球、開波先後、紅黃牌數等,真係多不勝數。甚至古靈精怪都有,連“阿蘇”咬人亦有兩位仁兄中大奬,難怪足球有如此魔力。
點都好,真真假假,假假真真,千祈唔好咁認真。今屆世界盃衹剩八場比賽,奉勸各位一句,投入還投入,千祈唔好泥足深陷。
Ben
足球評述員
留言