德國巴西贏得合理
昨日直踩通頂,睇晒兩場八強賽,雖然兩場推介都“衰咗”,但德國與巴西都贏得相當合理。
德國贏在整體配合,個人質素及大戰經驗,尤其隊長拿姆,舒雲史迪加,門將紐亞及入波功臣曉姆斯等,無論進攻與防守,都踢出德國波風格。
法國表現並非太差,全隊都發揮出應有水平,只不過,球員默契稍為不足,“斷纜”情況比較多,致命傷就係輸在最後埋門一腳。
巴西對哥倫比亞兩支南美對戰就激烈得多,兩隊加埋犯規次數共五十四次,平均唔夠兩分鐘就有一次犯規,尼馬更加成為受害者,緣盡餘下的兩場比賽。
其實巴西今場踢得比之前四場祇係好小小,只能靠兩個死球入波。當然,大衛雷斯嘅“導彈式”罰球不得不讚,不過,巴西以往嘅“森巴”踢法,已經難得一見。
哥倫比亞今戰明顯有所下降,可能之前對手較弱,又或者對住主辦國,始終發揮受到一定影響。總括嚟講,今屆哥倫比亞係值得一讚。
四強由德國大戰巴西絕對令人期待,唯一擔心,巴西冇咗尼馬與隊長泰亞高施華,能否過到德國呢一關,就要上帝保佑。
足球評述員Ben
留言