四強難猜王者
四強終於產生,巴西、德國、阿根廷及荷蘭都算大熱跑出,睇晒四場八強賽之後,如果你話汰弱留強,不如講係弱肉強食,因為哥倫比亞與哥斯達黎加的確讓我留下深刻印象。
至於四大雄獅邊隊能夠成為最終王者?實在難以猜測,今日就同大家分析四隊機會到底有幾多。巴西被譽為奪標第一大熱,但睇返過去五場表現,並冇真正王者風範,以前嘅巴西以悅目嘅組織、滲透式嘅進攻足球而聞名天下,而今屆嘅巴西完全欠缺呢種森巴風味。兩場淘汰賽都係靠有“帶刀侍衛”之稱嘅大衛雷斯食糊,可想而知今時今日嘅巴西已失去進攻銳利性,與德國一戰更加冇埋進攻核心尼馬,爭勝本錢真係唔多,過到呢關先算。
德國即係德國,睇完打低法國場波後,踢大戰果然深謀遠慮兼經驗十足,但要殺敗有地頭之利嘅巴西亦非容易。
四隊中嘅阿根廷應該最冇冠軍相,直接講句,如果班波冇咗球王美斯,“藍白間”到底會有幾多戰力?講來講去其實荷蘭最對辦,全攻全守嘅踢法簡直攻守兼備,真係對住邊隊都未驚過。不過,勝負始終都要睇臨場表現及發揮,一日未完場都未知鹿死誰手。
足球評述員Ben
留言