媒體
分類
新聞
巴西性感得好感性
2014-07-10 00:00
巴西性感得好感性
意想不到足球王國巴西竟會大敗一比七。巴西性感，是後防性感；巴西感性，是輸到喊感性。巴西今場冇尼馬同泰亞高施華，由大衛雷斯做隊長，賽前佢仲拎起尼馬件十號波衫，似乎好有決心晉級。雖然唔係支持，巴西單睇到都幾感動，同時覺得好值得學習。
巴西十一分鐘失咗一球後成隊波就亂晒，隊長大衛雷斯又未去到有大哥風範可以穩定軍心。德國畀我嘅感覺係用波用得好熟，巴西就亂上亂下，同埋巴西後防出奇地性感，德國踢兩腳就變咗三打二、二打三咁。以為世界盃去到四強，班球員一定會踢得好小心，入波唔會太多，點知四分鐘連失三球，半場就已經○比五，下半場再輸多兩球，真係睇到呆咗。電視直播好多巴迷喊晒口，梗係啦，七球喎，球迷大喊，球員又輸到喊，大衛雷斯、山度士當場流下男兒淚。
希望占士攞神射手
這邊死城隔離就天堂，德國高路斯入多一球，打破朗拿度的世盃入球紀錄；湯馬士梅拿都有入波，仲有機會爭做神射手。不過自己就唔太想佢做神射手，因為我更欣賞占士洛迪古斯。如果占士攞到神射手，我覺得係好大嘅鼓勵，唔止對占士，係對全部球員都好鼓舞。話畀人知只要你是有料，只要做好準備，即使不是贏在起跑線上，機會來到而你接得住，你就是成功的一個。筆下見真章，落場踢過就知邊個勁。
留言