巴西慘痛一役
上半場三十分鐘未到已輸五球,全場慘敗七個一皮,真係勢估唔到。被譽為足球王國嘅巴西在四強畀德國坦克撞到體無完膚,五馬分屍完全解體,令所有森巴球迷心痛欲絕,搞到“執屍隊”有排唔得閒,亦係巴西足球史上最恥辱一戰。
森巴兵團今仗踢到一無是處,進攻雜亂無章,防守錯漏百出,完全被德軍打到陣腳大亂,“大菲”應該輸得五體投地。冇咗尼馬與泰亞高施華,巴西成隊波嘅架構是否真係變得咁大差距?如果係的話,森巴足球已經去到末日。球員打得差的確係事實,中場毫無組織可言,過往悅目小組入滲更加欠奉,攔截力不足、防守力鬆散,攻不銳、守不穩,實在令人難以相信呢一隊就係巴西。
點都好,唔輸都輸咗,希望呢一場慘痛經歷,將悲憤化為力量,能在季軍戰踢場爭氣波,對國民有所交代。
德國今場發揮確令球迷嘆為觀止,不但信心十足,球員心理質素相當高,根本未驚過你“地頭”,完全踢出王者氣勢。執筆之時未知阿根廷抑或荷蘭誰勝誰負,但相信呢兩支決賽對手,睇到德國如此強勁霸氣,唔多唔少亦避忌三分。
足球評述員 Ben
留言