巴塞大變天
皇馬官方宣佈,德國國腳卻奧斯已正式加盟,成為球會今季第一簽。呢支應屆歐冠王肯定意猶未盡,狂追“新人王”洛迪古斯就係人都知,只係等簽字;仲有哥斯達黎加鋼門拿華斯亦係收購目標之一。加上本身強大班底,銀河戰艦來季更加“犀飛利”。
死對頭巴塞羅那當然不甘示弱,而且收購計劃多多。首先買入歐洲金靴射手蘇亞雷斯、克羅地亞好波之人拿傑迪、智利國門巴拉禾,目前傾緊仲有德國中堅曉姆斯及荷蘭左中場比連特。唔知比連特係“乜水”?佢就係雲佩斯超人頭鎚嘅助攻者,以及贏巴西三比○射入第二球嘅當打球星。如果成事的話,巴塞來季變動的確唔小。
費比加斯已簽約車路士;山齊士亦已加盟另一英超球會阿仙奴;沙維講到明要出走掘金;年輕射手泰路將會外借波爾圖;仲有艾華斯與桑治亦有離隊可能。即係話,巴塞來季陣容將會有較大變化。一向控球在腳的踢法,隨時亦會變形。始終新教頭安歴基屬於保守派,相信下季巴塞前中後三線都會大變天。
足球評述員 Ben
留言