皇馬,皇者登場
堪稱世界最頂級勁旅嘅皇家馬德里,前晚完成今季第一項任務,輕輕鬆鬆兩球擊敗西維爾,成功奪得歐洲超霸盃。
這一戰“銀河艦隊”的確“依絲執”,皆因超勁陣容確令對手難以招架,一場毫無懸念嘅勝仗,顯示出皇馬今季強勢出擊。連對方門神比圖及守將法斯奧都話輸得心服口服,讚皇馬如此強大攻力,兩球已經輸得少。
“艦長”安察洛堤今仗擺出一條“同花順”做正選,由“7”號仔C朗為首,卻奧斯、賓森馬、占士洛迪古斯再加巴利。五位仁兄都能獨當一面,件件都咁煞食,普通“二打六”防線又點頂得住。
以皇馬目前鼎盛人腳,相信當今世上任何一支世界級強隊,對住皇馬都會退避三舍。除咗一條“同花順”外,仲有摩特歴、拉莫斯、基迪拿、阿朗素及比比等星級戰將,安帥好似“打機”一樣,鍾意擺邊個、佈乜嘢戰陣,都能夠如魚得水,得心應手。
其實對住西維爾只係小試牛刀,先奪歐洲超霸盃亦係新一季好開始。西甲聯賽、歐冠及各項錦標都係球隊目標,睇好皇馬隨時可以大滿貫。
足球評述員Ben
留言