曼城闖“卡”不易
曼聯出場之後,今晚輪到衛冕英超冠軍嘅曼城亮相,將要作客有神經刀之稱嘅紐卡素。計往績,曼城的確贏成條街,近十次碰頭,“藍月亮”贏足九場,只係上季聯賽盃半力出擊情況下,被紐卡素摸和,似乎曼城食硬對手。但始終都係嗰句,打波逐場計數,較弱一隊未必輸梗。所謂知恥近乎勇,“紐記”主場必定踢出加一波,一於與曼城拼搏到底。初盤曼城讓半球/一球,不妨冷敲紐卡素力保不敗。
紐卡素一向踢法都係“鬥攻格”,話知你強隊抑或弱旅,都係同你攻足九十分鐘,所以稱為神經刀。今季更加強火力,除咗引入真馬特與卡比拿兩名國腳級球員外,仲有阿根廷小將費里拉,及法國兵利維亞尼兩位前線球員,實行有前冇後打死罷就。
曼城在社區盾慘吞阿仙奴三蛋,後防有唔少問題出現。當然,那是因高柏尼、沙巴列達、迪米捷尼斯及新加盟嘅沙格拿與文加拉等主力缺陣而受到極大影響。曼城“齊腳”的確相當強橫,只不過季初波,就要打拼勁及鬥志,呢方面紐卡素絕不輸蝕。推介:和波 2:2
足球評述員 Ben
留言