愛華頓爆“廠”
英超進入第二輪賽事,今日揀咗“藍紅”大戰推介畀大家,愛華頓火併阿仙奴。雙方近兩次碰頭一人一拳,阿仙奴在上季足總盃大炒愛華頓四比一,聯賽次循環“拖肥糖”則還以顏色,三蛋笑贈兵工廠,可見兩隊勢均力敵。
雙方踢法同樣快上快落,攻守皆以速度見稱,今戰對陣肯定殺得激烈。初盤平手,佔有主場之利嘅愛華頓較有着數,爆“廠”係時候。
愛華頓首戰出師不利,被升班馬李斯特城逼和,未能全取三分的確可惜。但球隊繼續踢出上季風格,中後場嘅強悍攔截及前線衝擊力,依然極具效率,與阿仙奴硬打硬真係未驚過。
阿仙奴真係馬不停蹄,啱啱在土耳其打完歐冠盃,今戰又要作客愛華頓,飛來飛去兼七日三戰,你話唔攰就假,體能上已經先輸蝕。以為阿仙奴捧走社區盾可以強勢開局,點知英超首戰只能驚濤駭浪險勝水晶宮,周中場歐冠盃同樣平淡度過,球員發揮都係一般水準。對住有骨頭嘅“拖肥糖”,少啲勁力都幾難哽,今戰和波已算功成身退。
推介:愛華頓2:1
足球評述員 Ben
留言