巴西難奏凱“哥”
今晨睇完兩場歐洲大戰後,明早可以轉吓口味,睇返場南美之戰,呢場友誼賽由巴西對哥倫比亞。
巴西在今屆世界盃只能屈居做“阿四”,認真徹底失敗。尤其係連續大敗畀德國與荷蘭,兩場波踢到一無是處,無論進攻與防守,都屬於超低水平。搞到厚面皮嘅“大菲”斯高拉利唔劈炮都唔得。
雖然森巴兵團再由鄧加重掌帥印,但一時一刻要球隊重振雄風又談何容易,至少條紙紮防線都有排執。今戰依然保留大部分決賽周主力,尼馬、大衛雷斯、奧斯卡、拉美尼斯及韋利安等為三線重心,相信陣式方面唔會有太大改變,問題係鄧加會否改變踢法,令球隊可以重現悅目嘅森巴足球。
哥倫比亞在決賽周表現可圈可點,可惜八強被巴西淘汰,希望今場可以復仇。哥倫比亞陣中有唔少猛料之人,占士洛迪古斯、法卡奧、馬天尼斯、古亞達度及古泰利斯等,件件都係殺傷力極強嘅恐怖分子。所以講到前線火力,哥倫比亞仲勁過巴西,巴西讓波揀硬哥倫比亞。
推介:和波2:2
足球評述員 Ben
留言