採訪武術一肚氣
今日係仁川亞運的首日正式比賽,估唔到第一日就受盡折磨。首日就有武術比賽,作為澳門最大機會奪得獎牌的項目,當然要到場見證這一刻。不過今屆武術的比賽場地真係“冇雷公咁遠”,位於新聞中心以北四十多公里的地區,車程大約兩小時。比賽上午九時開始,本澳記者清晨六時幾就出發,途經類似一些農村的田野小路,好不容易快到場館前,司機遙遠一指話對岸就是朝鮮,真係諗都冇諗過會與神秘的朝鮮這麼近。
通過安檢入場後,準備到地下的比賽場地拍攝,突然遭疑似是場地主管的工作人員阻撓,指拍攝地方有限,又話沒有預約不能拍攝。記者們連同多名香港行家一齊被趕到二樓,只能從高位拍攝。隨後眼見不少遲來的記者卻能施施然進入地下拍攝,有大細超之嫌。
香港記者多次與該疑似場地主管理論,後者懷疑不滿,隨後多次騷擾記者工作,港媒拍下他的工作證打算向組委會投訴後,再多次找港媒理論,最後更驚動警察,真的逼人太甚兼疑濫用職權。到頒獎禮前,又臨時加插新措施,每個國家地區只准一名記者拍攝,嚴重阻撓採訪工作,令唔少一心等待頒獎禮的記者白等一場,唔一肚氣就假。最後仲要再捱兩小時車程返回新聞中心,這樣就折騰了十二小時有多,真係救命呀!全日唯一高興是賈瑞為澳門開齋奪得銀牌,希望明天會更好啦!
(仁川二十日電)
本報記者 劉孟恆
留言