蝙蝠軍再“加”分
明晨有場西甲獨腳戲,由加泰對華倫西亞,雙方近年交手,華倫西亞有一定優勢。近四次碰頭,“蝙蝠軍”贏三埸,特别之處係近十幾次對戰都必分勝負,即係話“唔係你死,就係我返唔到屋企”。
加泰開季三場祇得一勝兩負,以人腳嚟講,表現喺咁上下,亦唔期望太高,希望今仗在主場繼續有好嘅發揮。
睇返過去三場水準,加泰亦有一定控球能力,可惜前線攻力比較疲勞,祇靠一個西班牙U21國腳華斯基斯單天保至尊,數糊力明顯不足,始終屬中下游分子,祇怪財力所限。
沉寂幾年之後,華倫西亞今季似模似樣,三戰取得兩勝一和不敗,兼且攻入七球。新晉西班牙國腳艾卡沙連埋國家隊比賽,已經連續三場有波入,狀態極佳,阿根廷中場皮亞迪表現相當搶眼,由賓菲加加盟嘅艾美達與洛迪高同樣交出功課,計埋回流嘅尼格度、施素高及拉美等具質素球員,“蝙蝠軍”今季實力提升唔少,今戰對手唔強,有望取得三連勝,初盤華倫西亞讓半球,可以值博。
推介 : 華倫西亞 2 : 0
足球評述員 Ben
留言