採訪運數似中六合彩
亞運會只係開賽幾日,外界評價如何還要拭目以待;不過嚟咗仁川幾日,組委會對傳媒的採訪安排就真係劣評如潮。想採訪亞運,第一件事亦係最重要的,就係要夠運氣,如果你運氣差點,或者可以提早收工了。
今屆亞運會各國代表團人數接近一萬八千人,其中運動員近一萬三千人。各地記者大軍亦不遑多讓,資料指有逾九千二百人登記,其中電視台超過六千人,攝影及文字記者都有三千人,韓國本地記者就佔超過一千人。雖然唔係所有登記的記者都來到仁川,亦非所有項目都有大批記者湧到,不過組委會對此還是非常擔心,早早就設定三個韓國人認為“高需求”的項目,分別係游泳、藝術體操及棒球。前兩者分別有朴泰桓及孫妍在兩位超級明星,自然吸引大批韓國傳媒。
不過隨着亞運賽事展開,逐漸變成幾乎每項都係“高需求”。指明每項決賽都係“高需求”,所有“高需求”項目採訪都要提前四十八小時登記,若然登記人數衆多就要抽籤,中籤機率隨時難過中六合彩,真係要睇運氣。抽籤結果在比賽前一日公佈,如果冇登記,隨時有權唔畀你入。因此之故,記者每日工作仲要加插研究未來兩日的賽程及登記。
就算登記咗又中咗籤,都未代表你有權入場館採訪,仲要按優先次序:官方優先、國際通訊社又優先,然後到韓國傳媒,最後才到境外記者。如果遇到有明星選手的項目而又入到場採訪,恭喜了,因為比中六合彩更好運。
(仁川廿二日電)
本報記者 劉孟恆
留言