皇馬求勝心“切”
皇家馬德里在歐冠盃大勝對手五個一皮後,上場聯賽繼續展現超強“鋒”力,八比二炒到拉科魯尼亞阿媽都唔認得,勁爆嘅攻擊組合終於擦出火花,以C朗為首嘅呢班“恐怖分子”仲堅過“泰米爾之虎”。明晨又再出動“恐襲”,目標只屬下游分子艾爾切,預料會在班拿貝球場展開大屠殺。艾爾切上場竟然齋吞伊巴兩蛋,自己主場出戰連升班馬都打唔贏,四個字形容:“叻極有限”,今場對住皇馬又係四個字:“輸少當贏”。初盤皇馬讓兩球半/三球,照捧銀河戰艦連珠炮發。皇馬今季正式賽事總共攻入十九球,全部由C朗、“J神”、“小豆”、“賓仔”及巴利五大攻擊手包辦,有組織,有個人突破,亦有長短炮轟門,多元化嘅攻門方式,簡直令對手防不勝防,艾爾切嘅“二打六”防線又點頂得住。睇一睇艾爾切嘅名單看似“星光熠熠”,有阿朗素、蘇亞雷斯、洛迪古斯、靴里拉及占美尼斯等名牌球星,不過都係同姓唔同名,只係A貨,對住皇馬一班“原裝正版”猛人,今仗恐怕醜態百出。
推介:皇家馬德里 5:0
足球評述員 Ben
留言