接待工作劣評如潮
今屆仁川亞運獲各地媒體劣評如潮,甚至有境外媒體已將今屆亞運評為史上最差的亞運,至少在接待能力方面,真係仲有好大改善空間。今日繼續亞運的彈劾系列,特別係交通方面的安排,三個字:差!差!差!
每逢大型運動會,無論對運動員還是前來採訪的記者,配備穿梭巴士往來各場館間一定唔少得,今屆仁川亞運當然亦有此“最基本”服務。亞運項目衆多,場館衆多又分散,要完善解決交通問題的確係一件頭痛的事。今屆亞運每個場館都設有傳媒穿梭巴士,最大問題係只有點對點開出,全部以傳媒中心為起始或終點站,如果記者想一日內走訪幾個場館,若只靠穿梭巴士,對不起了,這幾乎是不可能的任務。
穿梭巴士只有每個場館與傳媒中心對開,由一個場館想再去另一個場館,基本無論遠近,唯一方法就係先回傳媒中心再轉車。部分場館更加是南轅北轍,山長水遠,一來一回再轉車隨時花幾粒鐘,遊車河多過做。最簡單嘅解決方法,就係搭的士駁腳。嚟咗仁川咁多日,幾乎每日都要坐幾轉的士,每日車費閒閒地都幾萬元,還好這裡截的士比澳門容易上百倍,塞車情況亦唔算嚴重,問題總算自行解決。
穿梭巴士服務雖然免費,不過極唔方便,唔少記者採訪都選擇打的。亞運期間,相信的士成為最受惠行業之一。
(仁川廿四日電)
本報記者 劉孟恆
留言