英軍玩泥“沙”
呢期英格蘭嘅領隊鶴臣認真意氣風發,在歐國盃外圍賽連贏兩場後,聲言分組賽要十戰全勝出線。
“鶴兄”果然豪言壯志,贏兩場波好似贏咗成個世界一樣,完全忘記世界盃決賽周點樣“瘀皮”出局,仲幾乎冇得撈。現在又大大聲,扮“標青”。 “鶴兄”你好彩,外圍賽抽條上上籤,真正強手唔多,E組出唔到線,你真係要返去瞓。
上場五球大炒對手聖馬力諾,今晚繼續對住魚腩一族嘅愛沙尼亞,“三獅軍團”應該可以叻多次。始終對手並非全職業球員,質素有限,英軍至少高出兩班波以上。另外,陣中幾位新紮“獅”兄正處於當“弗”期,韋碧克,史達寧,張伯倫及亨達臣有態;朗尼大哥在英超停賽,可以在外圍賽盡情發揮;上場奪最佳球員的韋舒亞甚有大將風範,相信今晚又係表演時間。
雖然愛沙尼亞陣中有多名球員都出外揾食,包括效力德甲奧格斯堡嘅卡拉雲、蘇超馬瑟韋爾嘅奧查馬亞與安利亞等。但級數與英軍相比都係未入流,只望主場可以輸少幾球。推介:英格蘭3:0
足球評述員 Ben
留言