世界盃後遺症 (二)
昨日講過德國與荷蘭踢完世界盃後,表現未如理想。話口未完,德國在自己地頭又再失威,被愛爾蘭逼和,小組跌落第四位。好彩係與榜首嘅波蘭及愛爾蘭只相差三分,出線形勢冇荷蘭咁緊張。
德國今場波踢得好唔好就見仁見智,基本上都能夠踢出德國波風格,稍為失去少少耐性。最主要陣中欠缺重心人物,尤其中場位置,只靠湯馬士梅拿與卻奧斯支撐大局,德軍唯有寄望多名大將在下一場比賽中可以復出。
今日繼續講另一支頂級勁旅西班牙。其實都唔算係世盃後遺症,因為西班牙在決賽周分組賽出局經已令人大失所望,但估唔到近況表現依然未有起色,歐國盃外圍賽三戰兩勝一負,祇能擊敗兩支魚腩部隊馬其頓與盧森堡,又竟然敗於斯洛伐克腳下,完全失去強者本色。
歸根究底係迪保斯基換湯不換藥,雖然加入多名新血,但球隊陣式及踢法始終變化不大;幸好小組賽對手冇太大威脅性,打入一六年決賽周應不成問題,仍有兩年時間畀“紅牛”東山再起。
足球評述員 Ben
留言