羅馬博大“慕”
打完一輪歐國盃外圍賽及聯賽後,又輪到歐冠盃開戰,身為國腳級嘅超級球星一周踢兩場,都咪話唔辛苦。
明晨歐冠盃最強戲碼,應該係羅馬對拜仁慕尼黑,拜仁在E組兩戰兩勝,祇要今仗擊倒羅馬,可以“坐定粒六”等出線,即使和波依然形勢大好,拜仁和得起。主場嘅羅馬就要比較肉緊,因為除拜仁外,曼城亦係最大競爭對手,為保出線機會,必向拜仁狙擊,初盤拜仁要讓半球,捧硬羅馬不成功便成“仁”。
雖然羅馬陣中球員並未去到星光熠熠,但級數與份量並不輸蝕,尼恩哥蘭、費奧倫斯、迪斯度及拿積等都具有一定質素,實而不華,加上有“大哥大”托迪、迪羅斯與謝雲奴帶領,羅馬整體戰力絕對不能低估,就算今仗主場對住拜仁,亦有力坐和望贏。
又國際賽又聯賽,拜仁大部分球員都經過連場大戰,真係見到個波都驚,所以哥迪奧拿在上場對雲達不萊梅要作出輪換,對今戰亦極為重視,可惜球隊踢作客並未有十足把握,要贏氣勢不俗嘅羅馬,又談何容易。
推介:羅馬二比一
足球評述員 Ben
留言