皇馬起“塞”
今明兩日鍾意睇波嘅球迷一定唔得閒,因為激戰連場:英超有曼聯火併車路士;德甲有榜首之戰慕遜加柏對拜仁慕尼黑;意甲與法甲同樣有二三位之爭,森多利亞對羅馬及巴黎聖日門對波爾多。連中超亦唔執輸,上演廣州恆大鬥北京國安。今晚場西甲更加係矚目大戰,皇家馬德里惡鬥巴塞羅那。
呢兩支歐洲頂班勁旅實力毋需多介紹,陣中球星個個都係出名嘅江湖成名人物,齋講身價,加埋簡直係天文數字,呢場波唔睇點得呀!
豪取八連勝嘅皇馬上場作客利物浦,半場嘻嘻哈哈已經玩殘紅軍,兼且再度顯示出強大鋒力,可以媲美十級颶風。為要追貼死敵,皇馬今晚誓必怒斬巴塞。
巴塞同樣有超強嘅攻擊力,美斯、尼馬,再加“鋼牙”代言人蘇亞雷斯復出,呢場對攻戰肯定精彩激烈。不過,巴塞近期表現間中有驟雨,例如作客被馬拉加悶和,歐冠盃又輸畀巴黎聖日門,今戰作客皇馬確有一定暗湧。初盤皇家馬德里讓平手/半球,睇好銀河戰艦贏波。
推介:皇家馬德里3:1
足球評述員 Ben
留言