港明星足球場獻技
俗稱“小球”的甲組七人足球比賽結束後,一衆球迷要睇波又要等到明年的甲組聯賽開鑼。不過,今日下午二時半於氹仔奥林匹克運動場就有一場精彩比賽上演,由澳門夜遊人明星體育會對香港晨曦明星足球隊。
講得明星隊,又點可以缺少粒粒巨星呢?香港隊將由“校長”譚詠麟領銜出戰,連同陳百祥、譚兆偉等熱愛足球之人來澳比賽;澳門隊則派出譚又新、曹永輝及林家駒等星級猛將壓陣,上演一場精彩又激烈的攻防戰。今次有份踢的梁嘉恆就表示心情興奮,因為人生首次與校長和阿叻等人碰面就喺球場,肯定超級難忘,嘉恆同時表明賽後一定會“集郵”,並向各位前輩好好交流。曾經與香港明星隊踢過幾次的陳敏由於要到蓮峰球場觀看母校培華與慈幼的大戰,所以未必到場,不過他就憶述當年情況:“當時印象最深刻都係洪天明和馬國明,洪天明就真係好勁,馬國明就一般啦,不過都係一個好好的體驗。”今次難得再次邀請香港晨曦明星足球隊來澳作賽,大家又點可以錯過呢?比賽免費入場,歡迎市民到場“集郵”。
講起同香港交流,其實下星期二澳門一衆體記亦會過香港與當地體記進行羽毛球、籃球及足球的交流賽,聽聞焦點的籃球賽港隊更會派出伍家謙及“男神”柳俊江上陣。聽到已經非常興奮,賈某當然唔會錯過機會,與香港體記好好交流。
賈大廚
留言