黑貓大鬧水晶宮
英超兩支低下層球隊,水晶宮與新特蘭明晨展開一場搶分戰,兩軍近況都較低迷,齊齊排於下游位置,亟需搶分護級。水晶宮近三場僅兩和一負,上仗在領先兩球下,被西布朗完場前逼和,三分變一分,打擊都幾大。
新特蘭更加慘烈,兩連敗兼失十球,狂吞修咸頓八蛋一戰,仿如世紀大屠殺,差一球就平咗曼聯大勝葉士域治九比○嘅英超紀錄。不過,睇返上場對阿仙奴,“黑貓”並未受到重創打擊,雖然淨輸兩球,但整體表現並非“水皮”到咁交關。祇要繼續踢出頑強拼勁,對住同級波嘅水晶宮,未必輸得晒。初盤水晶宮讓半球,博新特蘭逆“水”行舟。
其實睇雙方人腳,大家都有唔少二線名氣球員,水晶宮有查馬克、沙夏、夏治蘭、費沙甘保及馬田基利等踢過大會球員。至於新特蘭亦有奧舒亞、布朗、拿臣、莊臣、S費查及卡達摩爾等身經百戰嘅球員。相比之下,只係你有半斤我有八両,水晶宮單憑主場就要讓半球,應該讓唔起。
推介:和波2:2
足球評述員 Ben
留言