兵工廠唔求“多”
阿仙奴在英超聯賽輸完又輸,近三場比賽祇得一和兩負,球隊狀態認真反覆無常,明晨在歐冠盃分組賽再遇德甲勁旅多蒙特,唔求多,祇要一分都已穩入十六強。冇太大壓力情況下,主場應可保住不敗。
多蒙特在德甲踢到冇神冇氣,目前更跌到落護級邊緣,但在歐冠分組賽就踢到神采飛揚,四戰全勝攻入十三球兼祇失一球,早已鎖定出線資格,真係吹佢唔脹。今場對住兵工廠,“蜜蜂兵”可以無憂無慮輕鬆對戰,既然和波對大家都有利,最好以和為貴。初盤阿仙奴讓平手/半球,捧多蒙特有着數。
阿仙奴近三場比賽最大論點應該係防守問題,三場共失七球。由馬迪薩卡、蒙利爾、張伯斯及基比斯組成嘅防線的確不敢恭維,四位護法都有唔少弱點,基比斯上場對曼聯更犯上超低級錯誤。一句講晒,呢條四人防線,簡直係球隊最大致命傷,就算攻力有幾強都冇用。
真係唔明“蜜蜂兵”聯賽與歐冠嘅表現會有咁大差别,可能球員對踢歐戰特別醒神。所以今戰作客酋長球場,仍然值得捧場。推介:和波1:1
足球評述員 Ben
留言