多蒙特唔驚殘“兵”
【本報消息】近況低迷的阿仙奴在歐冠盃D組迎來爭出線關鍵一戰,主場迎戰已出線的多蒙特。領隊雲格要面對傷兵滿營的問題,加上復出的射手基奧特不合資格上陣,令兵工廠爭勝本錢再打折扣,即使多蒙特今場未必去盡,阿仙奴仍冇穩勝把握。
多蒙特在D組踢了四輪全勝已率先跑出,提前鎖定十六強席位,阿仙奴握有七分排第二,領先第三的安德列治五分,出線形勢仍算樂觀,但要在分組的最後一次主場贏波反彈絕不容易。迪保治、奧斯爾一直養傷,對曼聯受傷的韋舒亞及門將施薩斯尼亦難趕及上陣。近三場不勝失七球,防線嚴重漏水,即使韋碧克、山齊士及艾朗藍斯等有態,入埋亦未必夠輸。
基奧特冇註冊齋睇
更慘是剛復出的法國射手基奧特無緣上陣。季前受傷後,原估計要至聖誕才能復出,故兵工廠未有為他註冊。豈料他康復較預期快,但最後兩場分組賽只能作壁上觀。同樣難披甲的施薩斯尼呼籲隊友振作:“上次主場對安德列治令人失望,我們須將它拋諸腦後,準備對多蒙特反彈,希望能鎖定十六強。多蒙特的反擊很強,有很好的射手。但只要我們有好表現,我有信心能夠贏。”
蜜蜂兵一分鎖首名
多蒙特目前領先次席的阿仙奴五分,今晚作客酋長球場仍有任務,需要多取一分鎖定小組首名,未能完全放軟。儘管“蜜蜂兵”在聯賽表現令人失望,日前聯賽又失分有護級壓力,但踢歐冠特別醒神;教練克洛普對撼阿仙奴亦很有心得,今季主場及上季作客都贏過。更重要是多蒙特人腳齊整得多,只有馬高雷斯無法上陣,米希達恩、奧巴美揚及恩莫比尼甚具殺傷力,面對阿仙奴的漏水防線,有望再爭“士哥”。
安德列治誓掃“雷”
同組安德列治與加拉塔沙雷出線只剩一線生機,前提必先自救贏波,就算出唔到線,亦要爭轉踢歐霸。安德列治主場出擊,遇上今季惡唔出的加拉塔沙雷,開齋機會較濃。
留言