祖記難勝“天”
意甲今晚有場好戲碼,由費倫天拿對祖雲達斯,兩隊都係意甲勁旅中嘅老字號,每次“埋牙”定必擦出火花。今年初歐霸盃十六強碰頭,費倫天拿慘遭祖雲達斯淘汰,今仗有仇報仇。
“紫百合”雖然目前在聯賽榜排第八,但實質與第三位只有四分之差,大有機會追上前四位置。計人腳,球隊陣中擁有唔少好波之人,包括馬里奧高美斯、古亞達度、大衛比沙路、費南迪斯及阿古蘭尼等國腳級球員,平均戰鬥力相當不俗。論狀態,近三戰全勝,攻入八球兼只失兩球,攻守都踢出應有水準,今晚對住榜首祖雲達斯根本未驚過,何況上季聯賽主場曾經四比二大挫對手,有信心坐和望贏。
祖雲達斯目前被羅馬力追,當然唔想有任何閃失,但今場硬仗絕非易打,上仗絕殺下游球隊拖連奴,都贏得相當驚險。此外,後防主力巴薩利與卡斯利斯有傷唔踢得,列治史迪拿又要停賽,防守中場艾沙莫亞同樣因傷缺陣,令防線大受影響,隨時被費倫天拿偷襲得手。初盤祖雲達斯讓半球,一於用“紫百合”祭“祖”。 推介:費倫天拿2:1
足球評述員 Ben
留言