兵工廠愛“浦”
“紅軍”利物浦在歐冠盃打道回府,聯賽又被榜首球隊拋離九丈遠,想爭標已好難,今季目標唯有疊埋心水踢盃賽。當然,唔代表聯賽會提早放棄,至少都要力爭上游,爭下季踢歐戰資格。此外,對住冤家球隊梗係唔衰得,正如今晚對住阿仙奴,輸人唔輸陣,輸晒返去瞓。
阿仙奴亦唔好得好多,但前景比較好,起碼歐冠仲有得博,最少可以搵多兩場錢。英超方面仍大有機會爭入前四,時運一定高過利物浦。所以今晚兩隊對陣,一定跟紅頂白,捧阿仙奴贏面機會較大,何況初盤開出平手,兵工廠坐和望贏。
講到兩隊近況,紅軍都差過兵工廠,近四戰只得一勝,仲只在聯賽盃擊敗英冠球會般尼茅夫,好聽啲叫“沖喜”,難聽少少叫做迴光返照。總括嚟講,利物浦近期發揮差強人意,實在不宜捧場。
相反,阿仙奴近六場各項賽事贏足五場,狀態相當不俗,近兩戰更攻入八球,計火力已經贏晒,至於對賽往績同樣佔盡優勢,所以毋須多考慮,一於捧兵工廠得“利”。
推介:阿仙奴2:1
足球評述員 Ben
留言