車仔小“城”故事
曼城大破水晶宮之後,聯賽積分經已與車路士平起平坐。踢少一場嘅“藍戰士”今晚出戰史篤城必要步步為營,因為史篤城一向靠主場搵食,發揮特別出色,連續兩場作客失分嘅車仔預料將會陷於苦戰。不過,車仔球員勝在質素高,埋門把握力夠強,今仗仍有一定勝算。初盤車路士讓半球/一球,照捧“藍戰士”可以攻陷“城”池。
史篤城嘅不列顛合金球場由於場地比較狹窄,球員埋身機會相對較多,對技術較好嘅球隊嚟講明顯不利。史篤城上次主場對阿仙奴,簡直自信心爆棚,上半場已經連轟三球,殺個措手不及。可惜球隊後勁往往成為致命傷,且防守能力比較差,已連續十一場有失球。今場對住英超火力最勁嘅車路士,恐怕難保不失。
車仔今季作客戰績一般,八場作客勝率只得一半,但由於被曼城迫到埋身,今戰必會加多兩錢肉緊。經過兩次“北上”失分教訓,“老摩”但求穩中求勝,加上上場聯賽盃作客擊敗打比,亦可加大今場爭勝決心。
推介:車路士1:0
足球評述員 Ben
留言