學界小將假期備戰
“又到聖誕!又到聖誕!”昨日冬至,過兩日又到聖誕佳節,滿街歡樂氣氛,大人細路為免虛度假期,有的選擇外出旅遊,留澳亦會盡力排滿行程,睇戲食飯,實行齊齊歡度節日。
講到長假,其實未必人人都有得唞有得玩,不少運動員仍在此時堅持訓練,正如一月四日便要出戰澳、港、粵、閩學界埠際越野跑的小將,賽事將至,不容鬆懈。同齡人士玩時,自己卻要訓練,有小將坦言已習慣,未有抱怨:“過去幾年都係咁!”
除比賽關係,亦有其他代表隊假期同樣堅持訓練。武術代表隊近年成績彪炳,每次出外比賽皆是爭牌主項。能保持高水平,運動員及教練付出不少,一年四季保持常規訓練。今年例外有區慶短假,皆因國家主席習近平訪澳,武術隊的訓練場地暫時封館。
澳門體壇處於業餘水平,與其他專業運動員相比,起跑線已經不同,若然對自身要求不高,恐怕更難趕上。但眼見朋友、同學個個放假去玩,自己要訓練,惰性可能就因而萌生:“偷懶幾日,無所謂啦!”能否堅持就要視乎個人定力。
本地業餘運動員要兼顧工作或學習,放工、課後利用私人時間參與訓練,暑假、寒假時,人地玩,自己又係要訓練。過往就聽過不少運動員講起,希望有假去旅行。對於很多居民而言,如此心願實在微不足道,但對長期要堅持訓練的運動員而言就很困難。
賈大廚
留言