英超三雄聖誕奇遇
英超踢多一輪比賽就打完半程,昨晨戰勝史篤城嘅車路士以三分之差,力壓衛冕嘅曼城繼續保住榜首之位,如無意外,車仔應可半程封王;不過,摩帥講得啱,半程冠軍只係得個名份,最緊要笑到最後。
進入下半季開始,相信英超會爭持得更加激烈,不單止車仔與曼城之爭,守住第三位、開始重返軌道嘅曼聯亦有機會急起直追,與車仔相差十分,話多唔多,話少唔少,因為列強對撼就等於六分波,加上聖誕檔期連場激戰過後,前列球隊可能會拉得更加緊湊。
尤其是車仔,聖誕賽程簡直係亡命飛車,先對陣兩支“異軍”韋斯咸與修咸頓,跟住打吡戰作客熱刺,呢三關絕對唔易過,能否保住“龍頭”之位都成疑問。
聖誕佳節,曼城超“車”係時候,皆因三場對手只係西布朗、般尼及新特蘭三支下游球隊,隨時可以“擔凳仔霸頭位”。
曼聯方面,過年前肯定冇可能得“一”想“二”,只要安分守己保住“小三”個位,博下半季再發力,希望可以冷手執個熱煎堆。
足球評述員Ben
留言