車仔大掃“錘”
英超快車今晚正式展開,排榜首嘅車路士先打頭陣,主場迎戰異軍突起嘅“錘仔幫”韋斯咸,為要力保“一哥”之位,三分志在必得。
韋斯咸今季表現突出,目前緊守前四位置,近五戰亦取得四勝一和不敗,狀態與士氣都相當不俗。祇不過,與對手實力較弱不無關係。今場對住一級勁旅嘅車仔,到底錘仔幫是龍是蛇自有分曉。初盤車路士硬讓球半,主場八戰八勝,史丹福橋球場威力驚人,料可上演“藍戰士大破錘仔幫”。
車仔主場確實勁力十足,計埋歐冠盃及聯賽盃,今季十二個主場贏足十一場,攻入卅二球,祇失六球,進攻銳利,防守堅固。最重要係球隊狀態保持穩定,特別係一對進攻核心費比仔與夏薩特,近期簡直“弗弗聲”,加上射手“迪哥”,足以搞掂韋斯咸。
錘仔幫真正實力有幾多應該有數得計,桑治算係最有名氣,卡奴爾、安拿華倫西亞及沙高祇屬二級國腳,與一班“車手”相比仍差一級,韋斯咸要挑戰列強始終未夠班,刹那光輝係時候終結。 推介:車路士3:0
足球評述員 Ben
留言