愛華頓難上“韋”
明晨足總盃將會有兩支英超球會對撼,愛華頓火倂韋斯咸,兩隊實力屬於半斤八両,預料係一場激烈之戰。
如果計往績,愛華頓完全一面倒佔優,已經接近八年未輸過畀韋斯咸,近十四次碰頭,愛華頓十勝四和,但又係嗰句,打波逐場計數,最緊要講近況發揮如何。
愛華頓今季表現大幅下跌,近期狀態更沉到不得了,近四戰全敗,前線只攻入兩球,後防共失九球,反映球隊防守能力相當脆弱,聯賽二十場失卅三球,係英超球隊中失球第二多,三後衛嘅防守踢法,的確需要改善,可能球隊太過着重於進攻,而最重要原因係多名核心球員踢唔出上季水準,今場對住實力相若嘅韋斯咸,“拖肥糖”實在難言穩勝。
“鎚仔幫”今季表現唔算“標青”,不過整體發揮總算令球迷滿意,雖然近三戰一和兩負戰績不佳,但考慮到之前兩場對手係車仔與兵工廠,屬於非戰之罪,今場足總盃一於與愛華頓打餐死。初盤愛華頓讓半球,九場聯賽主場只得三勝三和三負,對愛華頓贏波信心不足。
推介:和波2:2
足球評述員Ben
留言