日本大“斯”殺
今日介紹場亞洲盃決賽周賽事,由日本對巴勒斯坦,如無意外,在D組四支球隊中,日本應該是首名出線大熱,首戰更對住同組最弱嘅巴勒斯坦,呢三分簡直“依絲執”,只係贏多贏少問題。
事實上,巴勒斯坦與日本嘅足球水平相差的確較大,能夠打到入決賽周已經係一個超大進步,今場對住亞洲“一哥”,只希望全力以赴做到最好。初盤日本硬讓兩球,除非“藍武士”勒住嚟打,否則應可將對手碎“斯”萬段。
對今屆亞洲盃,日本擺明志在必得,香川真司、本田圭佑、岡崎慎司、長友佑都及吉田麻也等多名在歐洲搵食球星全部歸隊,只有效力史浩克○四嘅內田篤人因傷免役。如此強勁陣容,日本確有機會衛冕亞洲盃。
講到近況,日本近五戰取得四勝一負,只係輸過畀巴西,其中擊敗牙買加、洪都拉斯及今屆主辦國澳洲,球隊狀態相當穩定,今場對住殺傷力有限嘅巴勒斯坦,隨時大炒格。巴勒斯坦在國際足聯排名一百一十三位,齋睇排名,又點同日軍抗衡?推介:日本4:0
足球評述員 Ben
留言