學界賽事好戲連場
唔少中學生近期相信有排忙,皆因學界足球及排球早前煞科,今周又輪到學界籃球上演精彩的八強及四強戰,此外學界手球亦已正式開波。各位莘莘學子隨時打氣嗌都嗌到聲沙,今日又有男女籃A組最後一輪四強戰,各位準備好潤喉糖未?
學界比賽受歡迎唔使講都知,當中最受歡迎項目就肯定非籃球莫屬。由於競爭激烈、各隊實力相近、場內局勢又異常緊湊,加上場地唔受天雨關係影響,基本去到八強已經全場爆滿。有關方面近期安排亦非常窩心,擔心遲來的學生要企足幾個小時睇波,於是在上層加設大量摺凳,有學生直言是“人性化設計”。
另外唔知各位有冇留意中葡職中體育館近期翻新過呢?牆邊的木板全部重新鋪設,亦暫時將原有的藍色軟墊移除。有排球及手球運動員表示未太習慣,皆因藍色軟墊移除後,牆邊木板及地板的顏色幾乎融為一體,對自身判斷會有輕微影響,不過相信問題不大。中葡職中體育館翻新工作仍在進行中,雖然未知最後會否將藍色軟墊重新鋪上,不過站在攝記角度,現階段拍出來的相片確實美觀一點。
今晚又將舉行餘下兩場的籃A四強賽,頭場六時女A有培正迎戰鏡平,尾場八時男A兩隊大熱浸信及粵華先於四強碰頭。賈某再次提提大家,唔好遲到之餘,記得早啲到霸個靚位,為自己球隊吶喊助威。
賈大廚
留言