車仔“利”字當頭
英格蘭聯賽盃四強第二回合,車路士與利物浦明晨再度交鋒,首回合激戰九十分鐘後未分出勝負,為進軍溫布萊,今仗兩隊定生死。
車路士在足總盃爆出超級大冷門,主場竟然被低兩級嘅甲組仔巴拉福特炒起,係“老摩”重返史丹福橋後一大恥辱,為挽回面子,今場對住紅軍必會嚴陣以待,一班“車手”都要執生。對住巴拉福特,“老摩”確收起唔少主力,包括隊長泰利、艾雲奴域及迪亞高哥斯達等,費比加斯與夏薩特只踢了二十分鐘,但亦估唔到會被對手反敗為勝,最主要係球員過於輕敵及未集中精神,相信今仗“老摩”必在賽前向衆戰將“照肺”,積極改善比賽態度,只要踢出水準,車仔依然可睇高一線。
利物浦上場同樣失威,被英冠球隊保頓摸和,雖然攻勢一浪接一浪,但始終都係欠缺埋門把握一腳,“謝隊”休戰確實影響極大,尤其在前線威脅力,今戰復出,亦再可能是成也“謝隊”,敗也“謝隊”。初盤車路士讓一球,好明顯大莊絕對睇好車仔可以謀“利”。
推介:車路士2:0
足球評述員 Ben
留言