紅魔“劍”指足總盃
英格蘭足總盃果然係爆冷溫床,連英超“一哥”車路士與“阿二”曼城,同樣在第四圈被低組別球隊淘汰,認真超級大冷門,而曼聯與利物浦亦幾乎陰溝裡翻船,只能與劍橋聯及保頓悶和,搞到要擇日重賽,“雙紅”入唔入到第五圈,真係要好自為之。
曼聯明晨就要出擊,主場迎戰低三級嘅劍橋聯,好老實講句,就算你打一拳問一句,小弟都認為呢場波絕對冇可能再爆,只係睇下曼聯到底可以贏到幾多球?
雲戈爾早已表態,曼聯要爭今季聯賽錦標係相當困難,足總盃肯定係最大期望,其實上場贏唔到劍橋聯都已經好失禮,如果今次主場又失威,一衆“魔星”的確難辭其咎。
英乙廿四支球隊中,劍橋聯只係排第十四位,同曼聯相比確實差成幾班波,上次主場完全被曼聯“狂抽”,基本上係全無還擊之力,能夠死守成功總算大步檻過,但過到初一過唔到十五,今場去到奧脫福應該難逃劫數。初盤曼聯硬讓三球,印象中曼聯今季從未贏過對手三球以上,捧上盤似乎有一定風險,不如博二比○或三比○波膽。
推介:曼聯3:0
足球評述員 Ben
留言