識飲識食安心過年
每逢農曆新年,又係增肥的季節,賀年食品誘惑不斷,少啲定力隨時要肥住過羊年。賈某今日來提提大家,如何在新春期間食得安心又放心。
春節期間不少朋友都會進食蘿蔔糕或年糕等食物,寓意新一年步步高陞,不過又知唔知呢兩種食物最好“少食多滋味”呢?澳門專業營養師協會理事長吳文琦指出,蘿蔔糕及年糕的卡路里含量相對較高,進食兩件(約一副撲克牌大細為一件)已相等於一碗飯的熱量,所以決心於羊年瘦身的俊男美女,就要多多注意!
此外,大家亦會於全盒放置瓜子及糖果等零食,吳文琦建議大家可選擇低糖低脂的食物,杏仁及堅果類的食物就是其中之一,由於含豐富維他命E,對心血管有幫助。新年期間到茶樓飲茶,相信亦是必備的節目,提提大家可以選擇龍井及碧螺春等茶葉,除有消滯作用,亦可起到降血壓的功效,大家在春節期間不妨試試。
還有送禮環節,不少朋友在拜年時都會選擇朱古力或曲奇贈送親友。如果想送得更健康,吳文琦建議大家選擇送生果,因為朱古力糖份相對較高,曲奇亦含一定的反式脂肪,所以百利而無一害的生果相信是最佳選擇。
希望以上幾點對讀者有幫助,不過大家緊記健康除要在飲食方面入手外,運動亦很重要,世衛建議都市人每周須進行不少於一百五十分鐘的運動,祇要持之以恆,相信大家定可健康過羊年。
賈大廚
留言