車仔“熱”爆捧杯
英格蘭今晚有兩場重點賽事,聯賽有利物浦激戰曼城,聯賽盃決賽將由兩支倫敦球會車路士與熱刺爭霸。
先講利物浦對曼城,兩隊都在周中打完歐戰,紅軍就比較辛苦,周五凌晨打完場一百二十分鐘嘅歐霸盃後,馬不停蹄由土耳其飛返利物浦,今晚就要應付呢場大戰。加上頻密賽程肯定令球員“吃不消”,體能已成為今仗勝負最大關鍵。曼城在歐冠盃技不如人,在主場輸畀巴塞,次回合作客要反敗為勝的確相當困難,唯有在英超發圍,力追榜首車路士。球員休多兩日時間,體力絕對不成問題,有望繼首循環後再一次擊殺紅軍。初盤曼城讓平手/半球,捧曼城得“利”。
車路士上場聯賽被護級分子般尼逼和,已被曼城追近,但諗多無謂,最緊要先捧走聯賽盃一壯聲威。今晚再戰熱刺,誓報上場聯賽一敗之仇。
熱刺近四場比賽只係兩和兩負,球隊狀態明顯不足,啱啱場歐霸盃又落敗而回,士氣、體能以及平均戰力始終不及車仔,睇怕聯賽盃要拱手相讓。初盤車路士讓半球/一球,“熱”捧車路士。
推介:曼城2:1利物浦
車路士2:0熱刺
足球評述員Ben
留言