謝朗藍:衛冕冇壓力
上屆升組即贏得男A冠軍的謝朗藍以頭號種子出戰,昨日兩場小組賽皆以不失一局取勝,強勢殺入十六強。新華學校的謝朗藍衛冕之旅最大考驗將是澳坊的王駿,二人有機會在八強碰頭,上屆冠軍坦言:“近期與王駿交手都輸,自己處於下風,所以遇上冇咩壓力。”
學界人氣乒乓球手謝朗藍曾出戰世乒、亞運等各項大賽,技術得以提升之餘,心態變得更成熟,今次迎戰各校健兒的挑戰,目標完成衛冕。謝朗藍坦言:“打多咗大賽,落場冇咁緊張。”上屆以“細A”姿態成功奪冠的謝朗藍希望再一次封王,今屆會全力一搏,學界開賽前一周練足四日,狀態得以提升。
有信心贏王駿
要數衛冕之旅最大威脅,謝朗藍認為非王駿莫屬,早前在高單、代表隊內部賽紛紛敗於對手拍下:“自己近期少打波,打親都輸給王駿,主要是體力問題。王駿是防守型球員,打波好省力。”進攻型的謝朗藍指對方球風剋住自己,每次與王駿碰頭總是打得非常辛苦。為了今次學界賽事,訓練上有針對其打法,相信能闖過王駿一關,其後遇上另一勁敵蕭子康壓力不會如此大。
留言